أدب وفكر

ياريت

ياريت فيي صير
فراشة صغيرة وطِير
طير عا أبعد مدا
ع بلاد ما فيها حدا
لا صوت فيها ولا صدى
آخد معي شوية ورق آخد قلم
تعبان من كتر الألم
اقعد واترجاه يكتب عالهدى
يكتب غزل
يرسم ورد مفتوح قلبو للندى
يرسم أمل
ما عاد أعرف كيف شكلو هالأمل
خلّي القلم يرسم لحالو متل ما بيريد
ويلونو ويزيد
ألوان من قوس القزح
لأ لأ ….. من لون العلم
وياخد نجومو الخضر
يرشّا ع طول العمر
واترك الورقات للغيم للنجمات
للقمر السهران مع كمشة ولاد
ناطرين العيد
للريح ….
تاخدا وتروح وين ما تريد
بلكي بيقراها حدا
بلكي …. وبيرد الصدى
قومي ارجعي فلّوا العدا
قومي ارجعي فلّوا العدااااااا
فلّوا العدا

فايزة معماري

اترك تعليقاً